Седум години по смртта на легендарниот моден дизајнер Карл Лагерфилд, неговото наследство повторно е во фокусот на јавноста, овој пат поради правен спор што може значително да го промени начинот на распределба на неговиот имот. Тестаментот што го составил во 2016 година е оспорен од непознат подносител, што отвора можност за судска битка околу богатството проценето на околу 200 милиони евра.
Иако Лагерфилд во минатото често велеше дека „нема семејство“, францускиот закон за наследување може да го постави прашањето за неговите роднини по крв. Според актуелните информации, неговите внуци и внуки, кои првично биле целосно исклучени од тестаментот, би можеле да добијат дел од наследството доколку судот одлучи да го поништи документот.
Најпознатиот и најнеобичен дел од тестаментот се однесува на неговата бурманска мачка Шупет, која добила наследство од околу 1,5 милиони долари, како и куќа со градина и обезбедена постојана грижа. Лагерфилд уште за време на животот внимателно го планирал нејзиниот луксузен начин на живот, па токму овој дел од наследството се смета за најсигурен и најмалку спорен.
Остатокот од богатството, според неговата волја, бил наменет за луѓето што ги сметал за свое „вистинско семејство“, меѓу кои се неговиот долгогодишен асистент Себастијан Жондо, кумчето Хадсон Крониг и моделите Бред Крониг и Баптист Џабикони. Со своите роднини по крв Лагерфилд немал контакт со децении, а некои од нив не ги видел уште од 1970-тите.
Доколку судот го поништи тестаментот, според француското законодавство, имотот би можел да биде распределен меѓу најблиските роднини. Тоа би значело дека децата на неговите починати сестри би станале наследници, и покрај фактот што нивниот однос со дизајнерот бил речиси непостоечки. Во јавноста веќе се појавија изјави дека дел од роднините не би сакале да ги прифатат парите поради отсуството на каква било лична врска со него.
Дополнителна сложеност на случајот внесува и даночната истрага што ја водат властите. Се проверува дали Лагерфилд навистина живеел во Монако, како што тврдеше, или поголемиот дел од времето престојувал во Париз, што би можело да доведе до побарувања за неплатени даноци во износ од 20 до 40 милиони евра.
И додека правните и финансиските прашања остануваат отворени, едно е сигурно – Шупет останува заштитена. Познатата мачка продолжува да биде симбол на ексцентричноста и луксузот што го одбележаа животот на Карл Лагерфилд, додека судовите ќе одлучуваат како ќе се подели остатокот од неговото огромно богатство.
