NASA лансираше сателит со големина на машина за садови од Флорида во вселената за да идентификува каде има вода на површината на Месечината, на места како што се кратерите кои се постојано во сенка на неговите полови.
Ракетата SpaceX Falcon 9 полета во средата од вселенскиот центар Кенеди во Кејп Канаверал носејќи го NASA-овиот орбитер Lunar Trailblazer. Вселенското летело Lunar Trailblazer го изградил вселенскиот оддел на Lockheed Martin.
Површината на Месечината често се смета за сува, но претходни мерења откриле присуство на вода, дури и на потоплите, сончеви места. Долго време се претпоставуваше дека на студените места кои се постојано во сенка на половите на Месечината, можат да постојат значителни количества воден лед.
Lunar Trailblazer, кој тежи околу 200 кг и е широк околу 3,5 метра кога неговите соларни панели се целосно распружени, е испратен да најде и мапира водата на површината на Месечината.
За идни истражувања на Месечината, вклучувајќи потенцијални долгорочни месечеви бази во кои би работеле астронаути, месечевата вода би била од витално значење, бидејќи може да се преработи не само во вода за пиење, туку и во кислород и водородно гориво за ракети.
Предвидено е дека Lunar Trailblazer ќе изврши низа прелети над Месечината и кружни орбити во период од неколку месеци за да се позиционира и детално ја мапира површината. На крајот, ќе кружи на висина од приближно 100 км и ќе собира слики висока резолуција од целни области за да се одреди обликот, дистрибуцијата и изобилието на вода и да се разбере подобро месечевиот циклус на вода.
