Австралиската полиција соопшти дека истрагата за масовниот напад на плажата Бонди во Сиднеј не пронашла докази дека осомничените биле дел од поширока терористичка мрежа. Станува збор за двајца австралиски државјани со потекло од Филипините, татко и син, кои се обвинети за убиство на 15 лица и ранување на уште околу 40 за време на собир по повод еврејскиот празник Ханука.
Комесарката на Австралиска федерална полиција, Криси Барет, изјави дека досегашните сознанија укажуваат оти осомничените не поминале обука ниту добиле логистичка поддршка за нападот.
„Нема докази дека делувале по наредба на други лица или дека биле дел од организирана терористичка мрежа. Се смета дека дејствувале сами“, изјави Барет, додавајќи дека нивниот престој на Филипините не бил туристички, но дека засега нема потврда за директна поврзаност со странски структури.
Патување на Филипините и можни идеолошки влијанија
Според полицијата, осомничените поголемиот дел од ноември го поминале во градот Давао, на југот на Филипините, пред да се вратат во Австралија на 29 ноември. Две недели подоцна, тие го извршиле нападот на плажата Бонди.
Иако нема докази за организациска поврзаност, австралиските власти наведуваат дека нападот можел да биде идеолошки инспириран од екстремистичката организација Исламска држава, со оглед на тоа што во одредени делови на Филипините во минатото биле активни мали групи поврзани со ИСИС и Ал Каеда.
Полицијата соопшти дека при апсењето еден од напаѓачите бил убиен, додека другиот бил ранет.
Засилени безбедносни мерки за Нова година
Австралиските власти најавија засилено полициско присуство околу плажата Бонди и низ Сиднеј за новогодишните прослави. Се очекува околу 2.500 полицајци да бидат распоредени на должност, со цел да се спречат можни инциденти и да се гарантира безбедноста на граѓаните.
Премиерот на државата Нов Јужен Велс, Крис Минс, изјави дека Австралија нема да премине кон милитаризиран модел на полициско дејствување, но призна дека безбедносните протоколи мора да се адаптираат по најтешкиот напад во поновата историја на земјата.
Градоначалничката на Сиднеј, Кловер Мур, соопшти дека жртвите ќе бидат одбележани со едноминутно молчење за време на новогодишниот дочек во 23 часот.
