Поради појава на густа магла, видливоста на патниот правец Попова Шапка – село Лисец е намалена на околу 30 метри, информираат од Авто-мото сојузот на Македонија (АМСМ). Од таму апелираат до возачите да управуваат со зголемена внимателност и целосно да ги приспособат возачките навики на условите на патот.
Според последните информации, сообраќајот на државните патишта во земјава во моментов се одвива непречено, по претежно влажни коловози. Сите патни правци се проодни и безбедни за сообраќај, но поради повремени снежни врнежи на одделни места се препорачува намалена брзина и поголемо внимание.
Екипите на ЈП „Македонија пат“ се целосно ангажирани и постојано се на терен со соодветна механизација и работна сила за навремено расчистување на снегот. Активностите се спроведуваат во координација со Јавното претпријатие за државни патишта и Министерството за транспорт, со цел да се обезбеди безбедно и непречено одвивање на сообраќајот.
Надлежните институции уште еднаш апелираат до возачите за совесно управување, задолжителна употреба на зимска опрема, почитување на сообраќајната сигнализација и редовно информирање преку официјалните информативни центри за состојбата на патиштата.
