Градските власти на Хонг Конг утрово ја надгледуваа церемонијата на жалост за 128 лица кои загинаа во пожар во висока зграда, чиј број дополнително ќе се зголеми, бидејќи и по неколку денови по трагедија, 200 лица се уште се водат како исчезнати.
Шефот на администрацијата на Хонг Конг, Џон Ли, други функционери и државни службеници, сите облечени во црно, стоеја во тишина три минути во сабота наутро пред канцелариите на централната влада, каде што знамињата беа спуштени на половина копје.
А потоа се потпишаа во книгата на жалост.
11 уапсени
Властите уапсија 11 лица во врска со најлошиот пожар кој се случил во градот во последните 80 години, додека истражуваат можна корупција и употреба на небезбедни материјали за време на реновирањето на комплексот Ванг Фук Корт. Спасувачките операции на местото во округот Таи По, во близина на границата со континентална Кина, завршија во петок, иако полицијата соопшти дека може да пронајде повеќе тела додека ги пребарува изгорените згради како дел од тековните истраги.
Пожарот избувна во среда попладне и брзо зафати седум од осумте блокови со 32 ката во комплексот, кои беа завиткани во бамбусово скеле и зелена мрежа и покриени со пенаста изолација за обновата.
Алармите не работеле
Властите соопштија дека противпожарните аларми во населбата, дом на повеќе од 4.600 луѓе, не работеле правилно.
Пожарот е најсмртоносниот во Хонг Конг од 1948 година, кога 176 лица загинаа во пожар во магацин, и се споредува со пожарот во кулата Гренфел во Лондон, во кој загинаа 72 лица во 2017 година.
Властите минатата година им кажаа на жителите на станбениот комплекс дека се соочуваат со „релативно низок ризик од пожар“ откако тие постојано се жалеа на опасностите од пожар предизвикани од тековните реновирачки работи, изјави градскиот Оддел за работи за Ројтерс.
Жителите изразија загриженост во септември 2024 година, вклучително и за потенцијалната запаливост на заштитната зелена мрежа што изведувачите ја користеа за покривање на бамбусовото скеле, изјави портпарол на одделот.
