Купувањето е дел од секојдневието на Германците, кои во супермаркети и дисконти често одат неколку пати неделно. Според најновата анализа на порталот Kaufda за минатата година, се случила историска промена во потрошувачките навики: енергетските пијалоци ја презеле водечката позиција, потиснувајќи ја легендарната Кола на второ место.
Занимливо е дека пивото (пилс) се наоѓа дури на 24. место, додека минералната вода паднала на 43. место меѓу 50-те најпродавани производи.
На третото место се најде маслото, чија цена значително опадна во втората половина на 2025 година. Најголемо изненадување е авокадото, кое зазеде четврто место. Некогаш егзотично овошје, денес авокадото е најпопуларен свеж производ, надминувајќи класики како бананите, кои се на деветто место, додека јаболката дури и не се наоѓаат меѓу 50-те најпродавани производи.
Од свежо зеленчук, само пиперката успеала да се пробие на врвот на листата, заземајќи седмо место. Останатите позиции во топ 10 се претежно популарни, но помалку здрави производи: на петто место е чипсот, на шесто замрзната пица, на осмо Нутела, а на десето чоколадо.
Иако Берлинскиот ѕид падна пред повеќе од три децении, разликите во прехранбените навики меѓу источниот и западниот дел на Германија се сè уште видливи. На запад, Кола и натаму е најпродаван производ, додека на исток енергетските пијалоци убедливо доминираат. Краставиците се екстремно популарни на исток, додека на запад се на значително пониски позиции.
Анализата исто така откри и регионални особености. Во Шлезвиг-Холштајн, гумираните бомбони и сладичите се меѓу петте најпродавани производи. Во големите градови како Хамбург, Минхен и Франкфурт, авокадото е апсолутен хит, а во Франкфурт се наоѓа дури на третото место. Берлин се држи до класиката – таму доминираат Кола, краставици, банани и масло.
Во Рурската област се забележуваат специфичности: во Дортмунд пивото е на високо трето место, додека во Дуисбург Нутела бележи рекордна продажба. На западот на Германија, меѓу десетте најпродавани производи често се наоѓа и омекшувач за алишта.
