Во индиската држава Раџастан се наоѓа еден од најимпресивните архитектонски споменици во светот – степенестиот бунар Chand Baori, стар повеќе од илјада години. Сместен во селото Абханери, на околу 90 километри од Џајпур, овој бунар важи за најголем и најдлабок од ваков тип, со длабочина од околу 30 метри.
Изграден во 9 век по наредба на кралот Чандра, Chand Baori претставува совршен пример за древните системи за складирање вода во Индија. Степенестите бунари, познати како „баори“ или „баоли“, биле од суштинско значење за обезбедување пристап до подземни води, но истовремено служеле и како места за собирање и одмор.
Ова архитектонско чудо има форма на превртена пирамида со 13 нивоа и дури околу 3.500 тесни скали, распоредени во совршена геометриска симетрија. Бунарот е поврзан и со храмот Harshat Mata Temple, што дополнително ја нагласува неговата историска и културна вредност.
Покрај функцијата како извор на вода, Chand Baori бил и место каде луѓето се засолнувале од жештините, бидејќи температурата на дното е значително пониска отколку на површината. Во близина се наоѓа и дел со простории наменети за одмор на владетелите.
Денес, овој локалитет е заштитен национален споменик и привлекува бројни посетители, иако пристапот до самото дно не е дозволен. Туристите можат да уживаат во погледот од горните нивоа, особено на изгрејсонце или зајдисонце, кога светлината ја истакнува неговата уникатна структура. Импресивниот изглед на бунарот бил инспирација и за филмот The Dark Knight Rises.
