Знаете ли кој град го носи епитетот „најголем божиќен саем во Европа“? Не, не се работи за Виена, Минхен или Нирнберг. Неочекувано, титулата ѝ припаѓа на Крајова – град во југозападна Романија што последниве години стана вистинска зимска атракција на европската мапа.
Овој импозантен божиќен саем, кој зафаќа површина поголема од 280.000 квадратни метри, се протега преку плоштадот „Михај Витеазул“, просторот околу Националниот театар, како и централната пешачка зона. Овојпат, темата е балетската класика „Оревокршачот“, претставена преку светлосни скулптури, гигантски украси, играчки и празнични декорации што го претвораат градот во сценографија од бајка.
Саемот е отворен од 14 ноември 2025 па се до до 4 јануари 2026 година, период во кој Крајова станува една од најпосетуваните зимски дестинации во регионот.
Посетителите може да прошетаат низ највисоките „летечки“ санки на Дедо Мраз во источна Европа, да се избојат на големото панорамско тркало кое нуди спектакуларен поглед врз целиот град или да уживаат на отвореното лизгалиште. Влезот на саемот е бесплатен, но активностите – од панорамскиот тркало до тематските забави – се наплатуваат симболично.
Во рамки на празничниот комплекс се поставени околу 90 рачно декорирани куќички. Тие нудат богата разновидност од рачно изработени подароци, традиционални украси, локални производи и гастрономија карактеристична за источна Европа.
Крајова е вистинска културно-гастрономска мешавина, каде што се спојуваат вкусови од Азербејџан, Ерменија, Грузија, Грција, С. Македонија, Унгарија, Украина, Турција, Бугарија и Србија. Најпрепорачливо е да се пробаат „gogosi“ – меки, топли крофни посипани со шеќер, како и „cozonac“, празничен десерт сличен на маковник или оревник.
На штандовите ве очекуваат класични зимски специјалитети: печени колбаси, густ зимски гулаш, разни печива и, секако, ароматично греано вино со цимет, каранфилче и агруми.
Минатата година, божиќниот саем во Крајова беше прогласен за втор најдобар во Европа според платформата European Best Destinations — веднаш по Гдањск. Со својата комбинација од зимска магија, културни програми, гастрономија и спектакуларни светлосни инсталации, Крајова успеа да се издвои како ново омилено празнично прибежиште за патниците од целиот континент.
