„Доколку нема врнежи, ќе мораме да почнеме со ограничување на снабдувањето со вода следниот месец“, изјави Пезешкијан во петокот, пренесува Анадолија.
Комбинирана економска, еколошка и општествена криза
За време на посетата на градот Санандаџ, во западен Иран, претседателот истакна дека земјата се соочува со комбинација на економска, еколошка и општествена криза. Според него, високите цени и инфлацијата се резултат на внатрешни политички пропусти и на меѓународните санкции.
„Високите цени и инфлацијата се вина и на парламентот и на владата. Се вложуваат напори, но ограничените финансиски средства значат дека проектите остануваат недовршени,“ рече тој за иранскиот весник Daily Itimad.
Техеран во опасност од целосно исцрпување на водата
Пезешкијан предупреди дека сушата и недостигот на врнежи довеле до драматично намалување на водните ресурси.
„Ако не падне дожд, ќе мораме да го ограничиме снабдувањето со вода во Техеран следниот месец. Ако сушата продолжи, ќе останеме без вода и ќе бидеме принудени да го евакуираме градот“, изјави тој, опишувајќи ја ситуацијата како „алармантна“.
Претседателот нагласи дека е неопходно подобро управување и зачувување на водните и енергетските ресурси во земјата.
Водната криза и алармантните податоци
Водоснабдувањето на Техеран зависи од пет големи брани – Лар, Мамлу, Амир Кабир, Талекан и Латијан. Меѓу нив, најголема е Амир Кабир. Сепак, во последните пет години Иран бележи нагол пад на врнежите, а според метеоролошките податоци, оваа година нивото на врнежи во Техеран е околу 40% под сезонскиот просек.
Недостигот на дожд, особено во пролет и лето, предизвикал сериозно намалување на нивото на акумулациите, што влијаело и на површинските и на подземните водни резерви.
Техеранската управа за водоснабдување веќе во јули предупреди дека акумулациите кои го снабдуваат градот достигнале најниско ниво во последните сто години. Во летните месеци беа спроведени и повремени ограничувања на дотокот на вода.
На 3 ноември, шефот на управата за водоснабдување Бехзад Парса изјави дека браните имаат резерви доволни за само уште две недели, доколку сушните услови продолжат.
Пезешкијан и претходно, во јули, предупреди дека доколку не се преземат ефикасни мерки, снабдувањето со вода за населението ќе стане невозможно.
Извор: N1info.rs
