Анимираниот филм „Неми филмови“ на Крсте Господиновски освои две нови награди на меѓународни фестивали – награда за најдобар интернационален краток филм на Меѓународниот фестивал за краток филм „Вижн“ во Кемерово, Русија, и Почесно признание на Меѓународниот фестивал за анимиран филм КУАНДУ во Тајпеј, Тајван.
Како што рече режисерот Господиновски, од премиерата на фестивалот Анеси во јуни, „Неми филмови“ досега е прикажан на 28 меѓународни фестивали и има освоено седум награди.
„Ова е втора по ред награда во Русија и втора награда во Тајван, по октомвриската награда на престижниот ТИАФ кој се одржува во Тајчунг. Во септември филмот ги освои Гран-при наградата на Меѓународниот фестивал за анимиран филм „Аниматор фест“ во Јагодина и наградата од домашната публика на Меѓународниот фестивал за краток филм „Ѕирни“ во Скопје“, вели режисерот.
Филмот е копродукција на „Фокус покус филм“ и „Флипбук продакшнс“, поддржан од Агенцијата за филм на Република Северна Македонија.
