Цените на нафтата повторно експлодираат, откако новата ескалација на Блискиот Исток го внесе пазарот во состојба на неизвесност. Нападите врз нафтените инсталации во Обединетите Арапски Емирати предизвикаа брза реакција кај трговците и страв од нарушување на глобалното снабдување.
Референтната нафта „Брент“ се искачи над психолошката граница од 100 долари за барел, достигнувајќи 101,53 долари, додека американската „WTI“ се приближи до 95 долари. Клучен удар дојде од ОАЕ – еден од најголемите производители во рамки на ОПЕК – кој беше принуден нагло да го намали производството поради штетите на терминалот во Фуџаира. Според проценките, извозот е сериозно погоден, што дополнително ја зголемува загриженоста на пазарите.
Овој нов ценовен шок е уште еден сигнал дека енергетските пазари остануваат исклучително ранливи на геополитички ризици. Во услови на нестабилност, секој нов удар врз инфраструктурата веднаш се претвора во повисоки цени – и директен трошок што на крајот го плаќаат потрошувачите ширум светот.
