NASA успешно ја лансираше мисијата Artemis II, со што човештвото прави голем чекор кон враќање на Месечината. Ракетата „Space Launch System“ полета од Флорида со четири астронаути, означувајќи го првиот лет со човечка екипа околу Месечината по повеќе од 50 години.
Враќање на Месечината по половина век
Лансирањето се случи во 18:35 часот по локално време, а небото над Флорида беше осветлено од моќниот старт на ракетата висока речиси 100 метри. По пауза од 54 години, повторно испраќаме астронаути кон Месечината. Ова е резултат на долгогодишна работа и посветеност“, изјави Џаред Ајзакмен од НАСА.
Мисијата претставува клучен тест пред планираното слетување на Месечината подоцна оваа деценија.
Според директорот на летачки операции, Норман Најт, астронаутите се во добра состојба:
„Првите денови можеби нема да имаат апетит, што е нормално поради адаптацијата на телото на бестежинска состојба. Но, звучат одлично во комуникацијата – што е добар знак дека се чувствуваат добро.“
Екипажот во следните десет дена ќе ја обиколи Месечината и ќе се врати на Земјата, тестирајќи системи клучни за идни мисии.
Голем интерес и историско значење
Лансирањето привлече бројни ентузијасти долж брегот на Флорида, кои го следеа настанот со камери и телескопи.
За многумина, ова е историски момент:
„Ова е огромен чекор за Америка и за човештвото,“ изјави еден од присутните.
Американскиот претседател Доналд Трамп исто така ја коментираше мисијата:
„Ова е нешто посебно. Леталото ќе оди подалеку од која било претходна мисија со човечки екипаж, ќе ја обиколи Месечината и ќе се врати од досега невидена далечина.“
Мисијата Artemis II означува нова ера во вселенските истражувања. Ако биде успешна, ќе го отвори патот за повторно слетување на човек на Месечината – и потенцијално, за идни мисии кон Марс.
