Точно една третина од британските пратеници го повикуваат британскиот премиер Кир Стармер да ја признае палестинската држава, по примерот на францускиот претседател Емануел Макрон, кој вети дека ќе го стори тоа за време на годишната сесија на Генералното собрание на ОН.
Двеста дваесет и еден пратеник од девет политички партии претставени во Долниот дом со 650 членови потпишаа писмо во врска со ова, упатено до лабуристичкиот премиер Страмер и неговиот министер за надворешни работи, Дејвид Лами.
„Иако признаваме дека Обединетото Кралство нема моќ да создаде слободна и независна Палестина, признавањето од страна на Обединетото Кралство би имало значително влијание поради нашите историски врски и нашиот статус како постојан член на Советот за безбедност на ОН. Затоа повикуваме да се преземе тој чекор“, велат пратениците во своето писмо.
Иницијативата ја покрена пратеничката од Лабуристичката партија, Сара Чемпион, претседателка на парламентарниот Комитет за меѓународен развој.
Засега, нема реакција од кабинетот на Стармер по однос на иницијативата.
