Овој податок предизвика силни реакции во јавноста, со оглед на контроверзната природа на неговата музика, која честопати содржи националистички и ревизионистички пораки. Според платформата Entrio, речиси половина од билетите биле распродадени во првите шест часа, што покажува огромна поддршка, но и загрижувачки тренд на популаризација на екстремистички идеи.
Досегашниот рекорд го држеше италијанскиот пејач Васко Роси, кој во 2017 година продаде 225.173 влезници за концерт во Модена. Томпсон го надмина овој број за 25 проценти, што ја поставува Хрватска на светската мапа на концертни рекорди – но во исто време отвора прашања за влијанието на националистичката пропаганда преку музиката. Според Entrio нивните инженери морале да работат 30 часа без прекин за да се справат со техничките предизвици, вклучително и три хакерски напади, додека над 20.000 луѓе во еден момент чекале во виртуелната редица за билети.
Иако организаторите го претставуваат настанот како историски успех, не треба да се занемари фактот дека Томпсон веќе со години е симбол на крајно десничарската сцена во Хрватска. Неговата кариера започна со песната „Бојна Чавоглаве“, во која се глорифицира усташкото минато. Тој е редовно обвинуван за ширење националистичка и ревизионистичка пропаганда, а неговите концерти често се проследени со фашистички симболи и говор на омраза. Поради тоа, му беше забранет влез во неколку европски земји, вклучително и Швајцарија, каде што властите официјално го прогласија за непожелен.
Перковиќ со години негира каква било поврзаност со усташкиот режим, но фактот дека неговите настапи се користат за промовирање на екстремистички ставови останува несоборлив. Центарот Симон Визентал повеќепати го осуди неговото глорифицирање на усташките злосторства, особено преку песната „Јасеновац и Градишка Стара“, која го велича усташкиот терор и геноцидот врз Србите, Евреите и Ромите за време на Втората светска војна. Додека неговите обожаватели го претставуваат како патриотски уметник, критичарите го гледаат како симбол на опасната идеолошка рехабилитација на фашизмот во регионот.
