Генералниот секретар на Обединетите нации, Антонио Гутереш, денес изрази загриженост за можното зголемување на нестабилноста во Венецуела, откако САД го заробија претседателот на таа латиноамериканска земја, Николас Мадуро, и неговата сопруга Силија Флорес, под обвинение за шверц со дрога и оружје.
„Длабоко сум загрижен за можното интензивирање на нестабилноста во земјата, потенцијалното влијание врз регионот и преседанот што би можел да го постави за начинот на кој се водат односите меѓу државите“, рече Гутереш во писмена изјава што му ја предаде на Советот за безбедност шефицата на ОН за политички прашања, Розмари Ди Карло, на итен состанок на Советот за безбедност за Венецуела, објави Ројтерс.
Гутереш ги повика сите венецуелски актери да се вклучат во инклузивен и демократски дијалог. „Ги поздравувам и сум подготвен да ги поддржам сите напори насочени кон помагање на Венецуелците да најдат мирен пат напред“, рече Гутереш.
Тој изрази загриженост дека американската операција за апсење на Мадуро во Каракас во саботата, 3 јануари, не ги почитуваше правилата на меѓународното право.
Советот за безбедност, составен од 15 члена, се состана во седиштето на ОН во Њујорк само неколку часа пред Мадуро и неговата сопруга, Силија Флорес, да се појават пред федералниот суд во Менхетен по обвиненијата од САД за шверц со дрога и оружје. Се очекува на Мадуро и Флорес да им биде прочитано обвинението на суд, по што ќе се изјаснат за виновни.
Во тек е состанок на Советот за безбедност по апсењето на Мадуро, на барање на Венецуела
На барање на Венецуела денеска Обединетите нации одржуваат итен состанок на Советот за безбедност, откако Соединетите Американски Држави го уапсија венецуелскиот претседател Николас Мадуро и неговата сопруга и ги префрлија во затвор во Соединетите Американски Држави. Итниот состанок беше закажан со поддршка на постојаните членки на Советот за безбедност на ОН, Русија и Кина, објавува „Гардијан“.
На почетокот на седницата, рускиот амбасадор во ОН Василиј Небензја го осуди апсењето на Мадуро и го нарече чин на бандитизам. „Почетокот на новата година ги шокираше сите во светот кои се надеваа дека почитувањето на меѓународното право и немешањето во внатрешните работи на други држави, како и потпирањето на дипломатијата и компромисот, ќе станат клучни принципи на новата американска администрација. Нема и не може да има никакво оправдување за злосторството што САД цинично го извршија во Каракас“, рече Небензја.
Тој повика на итно ослободување на Мадуро и неговата сопруга Силија Флорес. „Русија е шокирана од цинизмот со кој Вашингтон дури и не се обиде да ги прикрие своите вистински цели во Венецуела, имено контролата врз ресурсите, односно бензинот“, рече Небензја.
Тој изјави дека Русија изразува силна солидарност со народот на Венецуела во услови на надворешна агресија. „Ние целосно го поддржуваме курсот на боливарската влада насочен кон заштита на националните интереси и суверенитетот на земјата“, рече Небензја и нагласи дека секој проблем меѓу САД и Венецуела мора да се реши преку дијалог. Според него, Вашингтон дава нов импулс на неоколонијализмот и империјализмот. „Луѓето од овој регион и глобалниот Југ како целина веќе го отфрлија тоа“, смета Небензја.
Постојаната мисија на Кина во ОН остро го осуди апсењето на Мадуро, наведувајќи дека САД го прекршиле принципот на немешање во работите на други земји и забраната за употреба на сила. „Како постојана членка на Советот, САД ги игнорираа сериозните загрижености на меѓународната заедница, безгрижно ги погазија суверенитетот, безбедноста и легитимните права и интереси на Венецуела и сериозно ги прекршија принципите на суверена еднаквост. Ниту една земја не смее да дејствува како светска полиција, ниту како меѓународен судија“, рече кинескиот претставник во ОН, Фу Конг. Кина ги повика САД да ги ослободат Мадуро и Флорес.
