Јавноста е се позагриженa од порастот на бројот на болни од HMPV, официјално познат како хуман метапнеумовирус. Оваа нова епидемија се појави изминатите неколку недели во Кина и зема замав. Различни постови на социјалните мрежи предупредуваат дека кинеските болници се преполни со пациенти кои се заразиле со HMPV и други вируси, од кои многумина имаат симптоми слични на КОВИД-19.
Откриен во 2001 година во Холандија, HMPV е сезонски вирус кој обично предизвикува инфекции на белите дробови. Еве што знаеме досега за порастот на инфекции со HMPV во Кина во јануари 2025 година.
Новата епидемија на HMPV вирусот во Кина беше призната од Кинескиот центар за контрола и превенција на болести, според извештајот на државниот весник China Daily.
Кан Бијо, претставник на агенцијата, изјавуви на прес-конференција дека се очекува зголемување на инфекциите со HMPV, инфлуенца, риновирус и микоплазмска пневмонија во текот на зимата. Кан рече дека ширењето на КОВИД-19 и други респираторни болести е „на ниско ниво.”
Додека некои постови на социјалните мрежи тврдат дека Кина прогласила вонредна состојба поради вирусите, нема докази кои ја потврдуваат оваа изјава.
Сепак, Кан верува дека инфекциите со грип ќе се зголемат кај деца на возраст од 14 и помалку години. Ширењето на норовирус, стомачна инфекција која предизвикува повраќање и дијареја, ќе остане на високо ниво во следните два месеци.
Како што забележува Американската асоцијација за белите дробови, HMPV е водечки причинител на акутни респираторни инфекции и слично на инфлуенцата, се шири преку близок контакт со заразен поединец. Тој предизвикува симптоми слични на обичната настинка, кои обично траат два до пет дена. Децата, старите лица и луѓето со ослабен имунитет се најпогодени за развој на понатамошни компликации, како што е пневмонијата.
Бидејќи HMPV веќе има влијание врз популациите во Соединетите Американски Држави и Кина, според Newsweek, стапката на колективен имунитет против него е многу поширока отколку што е случајот со нов вирус како што е КОВИД-19, така што ризикот од пандемија не е толку висок.
Во меѓувреме, на социјалните мрежи се шират снимки кои прикажуваат болнички оддели во Кина полни со пациенти кои носат маски и родители кои држат деца во долги редови на педијатриските оддели.
На снимките исто така се споменува дека крематориумите и погребните куќи се полни, пренесува „Дејли мејл“, но ваквите изјави не се официјално потврдени. Ситуацијата потсетува на зимата 2022/2023, кога Кина беше погодена од бран на случаи на пневмонија предизвикана од микоплазма, која исто така обично предизвикува благи симптоми.
Овој бран се припишува на нискиот природен имунитет на децата поради строгите карантини и затворање на училиштата, кои беа дел од мерките за борба против коронавирусот. Според официјалните извештаи на кинеските центри за контрола и превенција на болести, тековниот бран е поврзан со редовниот грип, бидејќи 30 проценти од тестовите беа позитивни на грип, а една од седум лица хоспитализирани со тешка респираторна болест беше позитивна на вирусот на грип.
Кинеската влада и Светската здравствена организација сè уште не се изјаснија јавно за видео снимките кои се широко споделуваат на друштвените мрежи. Според последниот извештај на кинескиот Центар за контрола и превенција на болести, забележан е пораст на случаи на заболувања слични на грип.
Податоците за неделата завршена на 29 декември покажале дека 7,2 проценти од амбулантните прегледи во болниците во северните провинции биле поврзани со болести слични на грип, што е пораст од 12 проценти во однос на претходната недела и над нивото од истата недела во сите сезони на грип од 2021 година. Во јужните делови на земјата, 5,7 проценти од амбулантските посети се однесувале на заболувања слични на грип, што е пораст од 21 процент во однос на претходната недела. Иако овој процент е над нивото од 2021 година кога бил 4,1 проценти, сепак е помал во споредба со 2022 и 2023 година.
