На парламентарните избори во Албанија, што ќе се одржат на 11 мај, право на глас ќе имаат 3.713.751 лице, во и надвор од државата, објави попладнево Министерството за внатрешни работи.
Доколку се направи споредба со резултатите од пописот произлегува дека бројот на гласачи е поголем за 1.311.648 од бројот на жители, кој според пописните резултати изнесува 2.402.113 лица.
Од вкупното гласачко тело, 114.642 лица за првпат ќе го остварат правото на глас, додека од списокот се избришани 1.081 граѓанин поради декриминализација.
За првпат во историјата на парламентарните избори во оваа земја, единствениот избирачки список, вклучува две категории, гласачи кои живеат во земјата и оние во странство. Правото на глас од дијаспората треба да го остварат 245.808 иселеници, чии апликации се прифатени од страна на Централната изборна комисија.
Дистрибуцијата на гласачките ливчиња до иселениците, во 85 држави во светот, ќе биде по пошта и ќе почне на 10 април.
Во 12 изборни единици, ќе се гласа на 5.225 избирачки места. Со одлука на парламентот важноста на личните карти со истечен рок, е продолжен до 31 мај.
Законодавниот дом брои 140 пратеници, од нив според изборниот законик загарантирани се 92 места, по 46 за двете најголеми партии, Социјалистичката и Демократската, која отстапи дел од пратеничките места на помалите партии со кои е во изборна коалиција. За останатите, 48 пратенички места, на отворените листи, за кои ќе се гласа на 11 мај, во трка се 2046 кандидати на 11 политички партии и коалиции.
