Изложба на фотографии со наслов „Над кулисите“ од фотографот Александар Томовски беше отворена вчеравечер во Предворјето на црквата „Света Софија“ во рамки на 63-тото Охридско лето.
Оваа поставка, како што вели самиот автор, е специјално создадена и наменета за годинешното издание на престижното „Охридско лето“ и уникатниот простор во предворјето на велелетната црква „Света Софија“.
-Во целиот концепт исполнет симболика и филозофија, беа изложени 12 фотографии испечатени на врвна Hahnemühle FineArt хартија во голем формат, кои од уникатна птичја перспектива доловуваат балетски изведби на сцената на македонската „Национална опера и балет“. Некако по навика возвишеното го бараме со залутан поглед нагоре, па овие фотографии пробуваат да одговорат на тоа – што ако се издигнеме повисоко и со поглед надолу сведочиме една возвишена креација манифестирана како спој на музика, движењата и формите, шаренила, приказни и емоции, вели Томовски.
Перспективата „зад кулиси“ е добро позната и вообичаена, но за да се направат овие фотографии од „над кулисите“ е потребен поголем напор што пак претставува возбуда за самиот автор. Зошто токму од птичја перспектива?
-Најверојатно на истиот начин како што се најдов и зад кулисите, воден од љубопитноста и истражување нови перспективи на повеќе или помалку познати приказни кои веќе подолго време ги „ловам“ на и околу сцената на македонската „Национална опера и балет“. Воедно и заради комплексноста и напорот да се создаде едно вакво уметничко дело, за кое ретко кој друг театар нуди вакви технички можности, појаснува Томовски.
Александар Томовски е роден 1985 година во Скопје. Тој е софтверски инженер, но и фотограф и филмаџија во останатото време.
Неговата љубов кон фотографијата се буди во природата и планинските височини, па се спушта и расте низ градските улици и се доближува до секојдневието на луѓето, за да се насочи постепено во доловување на суштината на жената, која низ вековите ја дефинира уметноста и претставува вечна инспирација за уметниците. Тука некаде го пронаоѓаат своето место и балетот и балерините, со сета елеганција и грациозност што ја поседуваат, но и експресиите преку глумата, танцот, костимите…
Низ годините, Томовски учествува на престижни меѓународни натпревари и групни изложби во истакнати галерии, стекнувајки се со бројни златни, сребрени, бронзени медалји, почесни награди, дипломи, признанија…
