Филмот ќе има кино-премиера на 6 март 2026 година во одбрани кина, додека на Нетфликс ќе биде достапен од 20 март истата година.
Се враќа Томи Шелби
Во центарот на приказната повторно е Томи Шелби, кого го толкува Килијан Марфи. Иако крајот на серијата навестуваше конечен збогум со ликот, Марфи вели дека приказната сè уште не е завршена.
„Се чини дека Томи Шелби сè уште не беше готов со мене. Огромно задоволство е повторно да соработувам со Стивен Најт и Том Харпер на филмската верзија на Peaky Blinders. Ова е филм за фановите“, изјави Марфи за Netflix Tudum.
Сценариото го потпишува креаторот на серијата Стивен Најт, додека режијата ја презема Том Харпер, кој и претходно режираше неколку епизоди од серијата.
Приказна сместена во Втората светска војна
Дејството на Peaky Blinders: The Immortal Man е сместено во Бирмингем во 1940 година, во екот на Втората светска војна. По самонаметнат егзил, Томи Шелби е принуден да се врати и да се соочи со најразорниот судир во својот живот. Додека судбината на семејството Шелби и на земјата виси на конец, Томи мора да се соочи со сопствените демони и да одлучи дали ќе се помири со своето наследство или засекогаш ќе го уништи.
Стивен Најт истакнува дека војната е клучен елемент во новото поглавје: „Земјата е во војна, а истото важи и за Peaky Blinders. Ова ќе биде експлозивно продолжение без задршка. Peaky Blinders во воена средина.“
Импресивна актерска екипа
Покрај Марфи, во филмот играат и Ребека Фергусон, Тим Рот, Бери Киоган и Стивен Грејем, заедно со уште неколку повратници и нови лица. Нетфликс веќе објави и први фотографии од филмот, што дополнително го зголеми интересот кај публиката.
Филмот е реализиран во соработка со BBC Film и е замислен како заокружување на приказната започната во серијата. Судејќи според тизерот, публиката ја очекува уште помрачно и подраматично поглавје, во кое Томи Шелби ќе се соочи со најтешките лични и морални одлуки досега.
Извор: N1info.rs
