На Харвард повеќе не можат да се запишуваат странски студенти. Ова е последица на потегот на администрацијата на Трамп, која сака да ја казни оваа елитна образовна институција поради одбивањето да ги следи барањата на американската политика, пишува CNN. Не само што буквално преку ноќ е запрен уписот на нови студенти, туку и постојните студенти со пасоши од други држави мора итно да се префрлат на друг универзитет или ќе го загубат статусот! Универзитетот возврати со тужба до федералниот суд, тврдејќи дека „со оваа одлука се крши законот“.
Ова предизвика огромна загриженост и бес, бидејќи таквите студенти претставуваат повеќе од една четвртина од вкупниот број на студенти на Харвард. Заканата дојде од Министерството за внатрешни работи, токму во моментот кога студенти од целиот свет се подготвуваат за упис на овој најстар и еден од најпрестижните универзитети во САД. Министерката за внатрешна безбедност, Кристи Ноем, нареди укинување на сертификацијата на Харвардовиот програм за студенти и учесници во размена (SEVP), наведувајќи како причина одбивањето на универзитетот да предаде податоци за однесувањето на странските студенти, кои министерството ги побара минатиот месец.
Реакции и последици
„Ова треба да биде предупредување за секој друг универзитет да се соземе,“ изјави Ноем за Fox News.
Харвардската секција на Американската асоцијација на професори остро го осуди, како што го нарече, „неуставниот напад на Трамповата администрација врз странските студенти“. Професорите предупредуваат дека „масовниот егзодус на странски студенти се заканува да ја задуши академската сила на институцијата додека се бори против администрацијата во Вашингтон за својата идеолошка автономија.“
Харвард има 9.970 лица во својата меѓународна академска заедница, а податоците покажуваат дека 6.793 странски студенти сочинуваат 27,2% од запишаните во учебната 2024/25 година. Во последните две децении, нивниот број пораснал за осум проценти.
Универзитетот остро го осуди овој потег, предупредувајќи дека меѓународните студенти и научници доаѓаат од повеќе од 140 земји и неизмерно го збогатуваат и универзитетот и целата американска нација. „Оваа одмазда ја поткопува академската и истражувачката мисија на Харвард“, изјави портпаролот на универзитетот, Џејсон Њутн.
Скриени мотиви?
Министерството даде нејасно образложение, кое Белата куќа го надополни со соопштение во кое практично го открива вистинскиот мотив за забраната за студирање за сите кои не се американски државјани. Наведуваат дека „уписот на странски студенти е привилегија, а не право, и дека раководството на Харвард ја претворило некогаш големата институција во легло на антиамерикански, антисемитски и протерористички агитатори.“
„Тие повеќепати пропуштија да преземат мерки за решавање на широко распространетите проблеми што негативно влијаат врз американските студенти и сега мора да се соочат со последиците,“ рече портпаролката на Белата куќа, Абигејл Џексон во изјава за CNN.
Политичка позадина
Медиумите потсетуваат дека раководството на Харвард и Доналд Трамп се во конфликт со месеци, откако универзитетот беше обвинет дека не реагира соодветно на пропалестинските протести по избиувањето на најновиот конфликт меѓу Израел и Хамас, како и поради поплаки од еврејски студенти за антисемитизам на кампусот.
Пред оваа мерка, Харварду му беа замрзнати 2,2 милијарди долари федерални средства, што универзитетот исто така го оспорува на суд. Даночната управа, исто така, планира да го укине статусот на Харвард како непрофитна институција.
„Ако Харвард достави петгодишна евиденција за однесувањето на странските студенти во рок од 72 часа, може да ја врати можноста за нивен упис,“ соопшти Кристи Ноем.
