Овојпат, публиката ќе има можност да ужива во специјален Liveurope showcase, кој ќе се одржи на 4 и 5 декември 2025 година во клубот МКЦ, со влез слободен.
Како дел од иницијативата #Liveurope, која ги поддржува концертните сали низ континентот во промовирањето на млади и талентирани европски артисти, на Cinedays: Музички блок ќе настапат шест различни бендови од регионот со свеж и автентичен звук.
Од Србија доаѓаат Ubili Su Batlera, кои ќе ја раздрмаат публиката со својот енергичен емо-пост-хардкор звук, инспириран од нивното ново EP издание од мај 2025 година. На сцената ќе се приклучат и Short Reports, познати по своите остри текстови и динамичен ритам, како и LU, чиј пост-панк израз нуди свежа визија и автентично сценско присуство. Посебен визуелно-музички настап ќе понудат Mitsko Biće, кои со својот космички инди пристап создаваат уникатна атмосфера.
Од Бугарија пристигнува Sunblinds, со својот препознатлив инди-рок и бедрум-поп звук, кој ветува безгрижна, лесна и мелодична енергија, додека Svire од Босна и Херцеговина ќе донесат емоционален и топол перформанс, исполнет со страст и интимност.
Фестивалската публика ќе може да ги доживее овие настапи на специјалната бина во клубот МКЦ, во две вечерни програми исполнети со нови звуци и европски енергии.
Програмата е овозможена со поддршка од Liveurope, првата паневропска иницијатива за промоција на млади европски музичари, која ги обединува водечките концертни сали од континентот во создавање на европска мрежа на современа музика.
