Јужноафриканските власти извлекоа најмалку 60 тела од шахта на затворен рудник за злато, кој се наоѓа на повеќе од два километри под земјата. Се стравува дека уште рудари се заглавени внатре, по блокадата која е дел од борбата против нелегалното рударење.
Блокадата на рудникот, која започна во август во градот Стилфонтен, околу 150 километри од Јоханесбург, ја прекина снабденоста со храна и вода во обид да се принудат рударите да излезат на површината за да можат да бидат уапсени.
Властите во понеделникот почнаа да користат метална корпа за да почнат извлекување на луѓето и телата од шахтата, а се очекува овој процес да трае со денови.
„Не знам точно колку луѓе сè уште се внатре“, изјави во вторникот доцна вечерта јужноафриканскиот министер за полиција Сензо Мчуну за телевизијата eNCA.
„Се фокусираме на тоа да стигнеме до нив и да им помогнеме да излезат.“
Тој потенцираше дека е тешко да се каже кога сите рудари ќе бидат извлечени.
Во вторникот беа извлечени 106 преживеани кои беа уапсени поради нелегално рударење. Ден претходно таа бројка изнесуваше 26.
Јужноафриканската индустрија за благородни метали со децении се бори против нелегалното рударење, кое ѝ нанесува штети на владата и индустријата во вредност од стотици милиони долари годишно поради загубени продажби, даноци и ренти, според проценките на рударскиот сектор.
Нелегалното рударење главно се концентрира на рудници кои компаниите ги напуштиле бидејќи повеќе не се комерцијално исплатливи. Нелиценцираните рудари потоа влегуваат во нив за да го извадат она што можеби останало.
Јужноафриканската влада изјави дека блокадата на рудникот во Стилфонтен била неопходна за да се спротивстави на нелегалното рударење, кое министерот за рударство Гведе Манташе го нарече „војна против економијата“.
Но, жителите и групите за човекови права ги критикуваат владините напори.
