Еден од најефикасните начини за подобрување на здравјето е редовното вежбање – кое помага во намалување на „лошиот“ LDL холестерол и зголемување на „добриот“ HDL. Но, многумина се прашуваат: дали постои идеално време од денот за вежбање кога станува збор за холестеролот?
Според експерти со кои разговарал порталот Eating Well – кардиолог, диететичар и фитнес тренер – не постои едно „најдобро време“ за сите. Но, постои време кое најдобро ќе ви одговара лично вам – и токму тоа е најважно.
Што велат студиите?
Иако нема универзален одговор, некои истражувања даваат предност на утринските вежби.
Кардиологот д-р Арон Фајнголд објаснува дека нашиот циркадијален ритам – биолошкиот часовник – влијае врз метаболизмот на мастите. Холестеролот најмногу се создава ноќе, па утринската физичка активност може да го прекине овој циклус и да го поттикне HDL холестеролот. Една студија покажа дека утринските вежби го намалуваат LDL и го намалуваат ризикот од срцеви болести и мозочен удар.
Од друга страна, вежбањето попладне или навечер исто така има свои предности. Според диететичарката Мари Спано, тогаш инсулинската чувствителност е поголема, што му помага на телото поефикасно да ги отстрани мастите од крвта. Подоцнежните тренинзи можат да ја намалат инсулинската резистенција до 25%, што е директно поврзано со подобрен липиден профил.
Предности на утринските вежби
- Помала веројатност за прескокнување тренинг поради дневни обврски
- Подобра контрола на апетитот и поздрави одлуки во текот на денот
- Подобрена инсулинска чувствителност
- Покачено ниво на тестостерон и хормон за раст – важно за метаболизам и мускулен тонус
Зошто некои луѓе повеќе одговараат на попладневно или вечерно вежбање?
- Телото е во поголема физичка кондиција попладне – мускулите се пофлексибилни, телесната температура повисока
- Подобри перформанси и можност за поинтензивен тренинг
- Одличен начин за ослободување од стрес по работниот ден
- Може да придонесе за подобар сон – а со тоа и за регулиран кортизол, кој влијае врз нивото на масти во крвта
Најважно – доследноста
Сите експерти се согласуваат: најдоброто време за вежбање е времето кое можете редовно да го почитувате. Без оглед дали е рано наутро или навечер по работа – она што е одржливо за вас, е најдобриот избор.
Како да започнете?
- Вежбајте најмалку 150 минути неделно (на пример, 30 минути, пет дена во неделата)
- Изберете активност што ви причинува задоволство: брзо одење, велосипед, пливање, вежби со тежини
- Планирајте однапред, вежбајте со пријател или побарајте поддршка од тренер
- Потсетувајте се зошто започнавте: подобро здравје, повеќе енергија, намален холестерол
Редовната физичка активност е една од најдобрите одлуки што можете да ги донесете за своето срце. Започнете со мали чекори – и нека времето на вежбање биде ваше време за здравје.
Извор: Index.hr
