Камењата во бубрезите настануваат кога во урината се наталожуваат кристализирани супстанции како оксалат, мокрачна киселина или калциум. Причините можат да бидат генетски, но и поврзани со здравствени состојби како дијабетес, гихт (воспалување на зглобовите), инфекции на уринарниот систем, висок крвен притисок или дехидратација. Без разлика на причината, секој што ги имал ќе потврди – болката може да биде многу силна.
Добрата вест е дека постојат неколку начини како можете да ги спречите. Првиот и најважен е внесување доволна количина вода. Друг е вклучувањето на одредени намирници кои помагаат во создавањето услови во телото неповолни за формирање на камења.
„Општо, исхраната богата со цитрати, а сиромашна со сол и оксалати, е најдобриот начин за превенција на камења во бубрезите“, велат нефролозите.
Јогурт
Најчест облик на камења во бубрезите се калциум-оксалатни камења. Тие настануваат кога калциумот се врзува со оксалат – супстанција која го поттикнува кристализирањето во урината. Иако може да изгледа спротивно, поголемиот внес на калциум преку исхраната всушност може да помогне во превенцијата.
„Калциумот во стомакот се врзува со оксалатот и го спречува неговото апсорбирање во крвта, намалувајќи го преминувањето на оксалатот преку бубрезите“, објаснуваат диететичарите. Затоа се препорачува во оброците и меѓуоброците да се вклучат три порции намирници богати со калциум, како што е јогуртот.
Ова е важно ако редовно јадете намирници богати со оксалати, како што се спанаќот, бадемите, цвекло. Кога станува збор за додатоци во исхраната со калциум, истражувањата покажуваат дека тие можат да го зголемат ризикот од формирање камења, па затоа е подобро да се изберат природни извори на калциум.
Кефир
Кефирот е уште една одлична намирница богата со калциум која може да помогне во заштитата од камења. Дополнително, содржи пробиотици кои придонесуваат за здравјето на цревата, а тоа индиректно може да го намали ризикот од камења.
„Бактериите кои живеат во цревата можат да помогнат во намалување на апсорпцијата на оксалатите и воспаленијата во бубрезите, со што се намалува ризикот од формирање камења“, објаснуваат диететичарите. Ако не сте пробале кефир, тоа е одлична основа за смути. Но, важно е со што го комбинирате – бобичесто овошје, иако здраво, може да содржи високи нивоа на оксалати. Наместо тоа, користете банани, праски или манго.
Портокали
„Цитрусите како портокалите се богати со цитрат, супстанција која ја намалува pH на урината и така го отежнува формирањето на камења“, вели Хернандез за Eating Well. Но, не сите цитруси се еднакво ефективни. На пример, едно истражување покажало дека сокот од портокал (и во помала мера лимон) го намалува ризикот, додека сокот од грејпфрут може да има спротивен ефект.
Иако сокот од портокал е корисен, содржи многу шеќер, па пијте го умерено.
Махунарки (лебјебија и леќа)
Замена на дел од животинските протеини (говедско месо, свинско месо, пилешко месо, риба, морски плодови) со билни извори може да помогне во превенцијата. Причината за тоа е што животинските протеини се богати со пурини, супстанции кои го зголемуваат ризикот од камења.
Леблебијата е добар извор на протеини без вишок пурини. Исто така, е богат со влакна кои го поддржуваат здравиот микробиом на цревата. Дополнително, има пониско ниво на оксалати од другите махунарки, што го прави одличен избор. Леќата е уште еден одличен билен извор на протеини, со малку пурини и оксалати, а со многу влакна.
