Иако на настанот немаше политички транспаренти, германските медиуми го оценија собирот како силна политичка порака – мирен, достоинствен, но исполнет со потиснат гнев и барање за правда.
Во текст за берлинскиот Tageszeitung, новинарот Андреј Иванји го опишува Нови Сад како „ранет град“. Тој пренесува сцена на шестнаесет минути тишина – по една за секоја жртва – каде се слуша само шумолене на лисја и звук на дронови. „Под тишината се крие потиснат бес – желба за правда за оние кои ја платија цената на корупцијата“, пишува Иванји, нагласувајќи дека никој сè уште не е повикан на одговорност.
Авторот заклучува дека „граѓаните на Србија во изминатата година го надминаа стравот – и тоа е најстрашното што може да му се случи на еден автократ.“
Гласот на мајката – симбол на неправдата
Во Rheinische Post, новинарот Томас Розер ја опишува болката на Дијана Хрка, мајката на 27-годишниот Стефан, кој загина при уривањето на настрешницата во 2024 година. „Кога ми го покажаа неговото тело, викав и се тресев. Тоа не беше несреќа – тоа е резултат на корупција која убива“, изјавила Хрка.
Таа додава дека сè уште никој не одговарал за трагедијата: „Додека виновните не бидат осудени, претседателот е за мене одговорен. Тој го уби моето дете.“
„Многу и малку“ – студентскиот отпор под лупа на „Франкфуртер алгемајне“
Новинарот Михаел Мартенс од Frankfurter Allgemeine Zeitung ја анализира улогата на студентското движење, поставувајќи го прашањето: „Што навистина постигнаа студентите?“
Одговорот, според него, е двоен: „Многу, затоа што по повеќе од една деценија Вучиќ првпат е ставен во дефанзива. Но и малку, бидејќи структурата на моќта остана непроменета – парламентот, институциите и медиумите сè уште се под контрола на власта.“
Мартенс потсетува дека иако студентите најавија создавање сопствена изборна листа, таа сè уште не е формирана. „Без јасен политички план, движењето ризикува да се загуби во сопствените несогласувања“, пишува тој, додавајќи дека клучните прашања – од односот кон ЕУ и Русија, до статусот на Косово – би можеле да го поделат протестниот фронт.
„Нови Сад е град во тишина, но под површината врие гнев и решителност – за правда, одговорност и промена“, заклучуваат германските медиуми.
Извор:N1info.rs
