На средбата на украинскиот претседател Володимир Зеленски со американскиот претседател Доналд Трамп во се очекува една од главните теми на разговор да бидат крстосувачките ракети со долг дострел „Томахавк“.
Трамп неодамна најави дека би можел да се согласи на претходното барање на Киев за испорака на ова модерно оружје.
Зеленски постојано бара поголема воена помош од САД за да го засили украинскиот контранапад против Русија. Украина неодамна почна да користи сопствени ракети со долг дострел, како „Фламинго“, но се надева дека токму „Томахавк“ може да го преобрати текот на конфликтот.
Зошто „Томахавк“?
Овие американски ракети можат да достигнат цели на растојание до 2.500 километри, што значи дека Москва би можела да биде во дострел од украинска територија.
Иако летаат подзвучно, ракетите „Томахавк“ летаат ниско – блиску до земјата – и се многу тешко забележливи и пресретливи. Покрај тоа, тие се исклучително прецизни, благодарение на напредната навигациска технологија.
Пречки за испорака
Сепак, голем предизвик е тоа што „Томахавк“ главно се лансира од бродови и подморници, кои Украина ги нема. САД неодамна развија копнени лансери, но тие бараат посебна обука пред употреба.
Улогата на американската поддршка
Доколку Украина добие „Томахавк“, САД ќе мора да обезбедат детални разузнавачки информации за да се зголеми ефикасноста на нападите. Веќе постојат извештаи дека американски специјалци ќе учествуваат во подготовката и планирањето на мисиите.
САД имаат голем арсенал од овие ракети, но не е веројатно дека ќе испратат доволно за да се смени целосно динамиката на фронтот. И покрај тоа, дури и неколку десетици „Томахавк“ ракети би можеле значајно да влијаат, особено во напади на руската инфраструктура.
Руски одговор
Русија остро реагираше на можноста за испорака. Портпаролот на Кремљ, Дмитриј Песков, изјави дека тоа може да доведе до ескалација.
Поранешниот претседател Дмитриј Медведев дури предупреди дека таквата одлука би можела да биде „опасна по Трамп лично“.
Во меѓувреме, Трамп го заострува ставот кон Москва, незадоволен од недостаток на напредок во мировните преговори. „Дали Русија навистина сака ‘Томахавк’ да лета кон нив?“, праша тој неодамна.
