Според пишувањата на шпанскиот портал Defensa Central, хрватската фудбалска легенда планира да се врати во Реал Мадрид, клубот со кој постигна историски успеси, но тоа нема да се случи веднаш. Модриќ сака по заминувањето од Милан, каде што и понатаму бележи импресивни настапи, да земе една година пауза и тоа време да го посвети на своето семејство.
Во план му е потоа да започне тренерски курсеви и постепено да ја гради својата кариера во тренерството – најверојатно во младинската академија на Реал Мадрид, каде би работел со деца, што според него би бил идеален почеток.
Иако веќе има договорен концепт за враќање во Мадрид, Модриќ не брза со одлуки. Неговите настапи во Милан се на високо ниво, а клубот е целосно задоволен од неговиот професионализам и влијание во тимот.
Во наредните месеци, двете страни ќе разговараат за идните чекори, велат шпанските медиуми. Засега, главниот приоритет на Модриќ е учеството на претстојното Светско првенство, каде што сака да ѝ даде уште еден историски момент на хрватската репрезентација и достоинствено да се збогува од националниот дрес.
Во својата блескава кариера, Модриќ стана симбол на постојаност и врвна техника. Со Реал Мадрид освои 28 трофеи, меѓу кои и пет титули од Лигата на шампионите, додека со Хрватска беше втор и трет на Светските првенства, како и вицешампион во Лигата на нации.
По децении на успех и верност кон клубот и татковината, Модриќ останува пример за фудбалска величина и човек кој сè уште не кажал последен збор во спортот.
Извор: DubrovnikTimes
