Македонско научно друштво (МНД)-Битола го одбележа меѓународниот ден на жената 8 Март со тркалезна маса на тема „Женски поетски хабитус“.
На тркалезната маса со свои излагања настапија членови на МНД-Битола и членови на Друштвото на писателите на Македонија и секој од нив даде свое видување за книжевен текст напишан од жена авторка од Битола и Битолско, истакна проф. д-р Даниела Андоновска-Трајковска, претседателка на МНД-Битола.
-Идејата произлезе од согледбата дека во нашата современа книжевна критика недостасуваат текстови кои аналитички и критички му пристапуваат на книжевните текстови напишани од жени, а и од потребата да се отвори поле за дискусија за книжевните дела напишани од жени без да се прават обиди да се вкалапуваат тие дела во некаков претходно утврден канон на вредности поставени низ историјата на „машката“ перцепција на „женското“, односно без да се пристапува кон книжевниот текст напишан од жена со предрасуди дека таквото писмо е емотивно, разнежнето, нежно, тивко, суптилно, романтично, патетично, посочи Андоновска-Трајковска.
Авторските текстови ќе бидат објавени во посебно издание на МНД-Битола и тоа понатаму ќе служи како основа за развој на книжевната научна мисла, потврдија организаторите на тркалезната маса во Битола.
