Во Европскиот парламент во Брисел на 6 ноември 2025 година беше промовирана публикацијата „Справување со младинскиот евроскептицизам на Западниот Балкан: Случајот на Северна Македонија“. Публикацијата ја изработија Европски центар за извонредност (ЕЦЕ) од Брисел во соработка со Фондација Фридрих Науман и Институт за добро управување и евроатлантски перспективи (ИДУЕП) од Скопје.
Во обраќање пред промоцијата, европратеничката Ирена Јовева напомена дека повторувањето на фразата „нашата иднина е во ЕУ“ кај младите често е проследено со сомнеж дали навистина припаѓаат таму. Според истражувањето од публикацијата, 46% од младите во Северна Македонија сметаат дека земјата никогаш нема да се приклучи на ЕУ, додека 40% веруваат дека тоа ќе се случи евентуално.
Еден од авторите, директорот за политика и комуникации при ЕЦЕ, Бојан Кордалов, истакна дека три клучни аспекти треба да се адресираат: видливи резултати од ЕУ-понудите, активно вклучување на младите и промена на негативниот наратив.
Публикацијата укажува дека младинскиот евроскептицизам не значи отфрлање на идејата за Европа, туку недоверба во процесот и воздржаност поради недоволно видливи придобивки од пристапниот процес.
Предложените препораки вклучуваат: зголемување на дигиталната медиумска писменост, зајакнување на граѓанското учество на младите, подобра комуникација на европските вредности и конкретна истакнатост на придобивките од членство и пред него.
