Редовното чистење на машината за перење е клучно не само за подолг век на уредот, туку и за квалитетот на перењето на облеката.
Насобраната нечистотија во машината може да ја намали ефикасноста на перењето, поради што облеката понекогаш не мириса свежо или на ткаенините се појавуваат бели дамки.
Првиот чекор во чистењето е фиоката за детергент. Кај повеќето машини таа лесно се вади и треба темелно да се измие од сите страни. Токму на тоа место најчесто се собира прашина, како и остатоци од детергент и омекнувач, кои подоцна можат да остават траги на облеката.
По чистењето на фиоката, се препорачува да се исчисти и долниот филтер на машината. Тој се наоѓа во долниот дел од уредот и обично е достапен преку мала вратичка.
Следниот чекор е дезинфекција на внатрешната страна од вратата на машината, што може да се направи со алкохол. Откако ќе се заврши чистењето, се препорачува машината да се вклучи празна на програма за перење на околу 90 степени.
Во фиоката може да се стави комбинација од сода бикарбона и лимон или оцет, што дополнително помага во отстранување на наслагите и непријатните мириси.
Со правилно и редовно чистење на машината за перење, облеката ќе остане свежа и чиста, а уредот ќе работи поефикасно и подолго.
