Министерството за култура и туризам денес ќе ги објави Конкурсите за поддршка на проекти од национален интерес во културата на кои заинтересираните апликанти до 31 октомври ќе може да се пријават електронски преку националниот портал за е-услуги.
Министерот Зоран Љутков најави промени во начинот на финансирање на проектите.
– Оценката на проектите ќе се врши согласно исполнувањето на општите услови кои се исти за сите подносители на проекти, како и исполнувањето на посебни услови што се јасно утврдени за секоја област поединечно. Согласно видовите на проектите и во функција на транспарентна распределба на средствата, во пријавите во годишните конкурси оваа година прецизно е утврдено кој вид на проект со колку средства максимално може да биде поддржан. Новина оваа година е тоа што во годишните конкурси нема да се финансираат интердисциплинарните проекти и креативните индустрии и за нив Министерството ќе преземе други мерки и активности по препорака од Државниот завод за ревизија – изјави Љутков.
Министерот истакна дека буџетот за областите и активностите од културата за 2025 година е зголемен за 70 милиони денари.
Техничките упатства и поддршка при регистрирањето, кандидатите што ќе аплицираат ќе може да најдат на веб-страницата uslugi.gov.mk и преку контакт-центарот на е-услуги.
На располагање за помош на тие што ќе аплицираат со проекти ќе бидат одделенијата односно секторите во Министерството за култура и туризам кое на својата веб-страница ќе ги објави контактите на задолжените лица и нивните е-адреси.
Исто така, во Охрид, Битола, Штип, Струмица, Гостивар и Скопје, а по можност и во други градови, во наредните денови ќе бидат организирани информативни сесии во врска со пријавувањето за заинтересираните кои сакаат да аплицираат на конкурсите.
