Министерот за надворешни работи на Малта го номинираше Трамп за Нобелова награда за мир
Министерот за надворешни работи на Малта, земја членка на Европската Унија, Иан Борг, денес изјави дека го номинирал американскиот претседател Доналд Трамп за Нобелова награда за мир.
Во објава на Фејсбук, Борг го наведе успехот на Трамп во мировните преговори меѓу Ерменија и Азербејџан и неговите напори за прекин на војните на Блискиот Исток и Украина.
Рокот за номинации секоја година за наградата е 31 јануари.
Добитникот на Нобеловата награда за мир за 2025 година ќе биде објавен утре.
Лидерите на Азербејџан и Ерменија потпишаа договор во Белата куќа во август за прекин на деценискиот конфликт, што Трамп го поздрави како „историски“ чекор.
Израел и палестинската милитантна група Хамас потпишаа договор за прекин на огнот и ослободување на израелските заложници во замена за палестински затвореници, првата фаза од иницијативата на Трамп за прекин на војната во Газа.
Борг објави фотографија од себе на средба со Трамп, кој долго време отворено ја бара престижната Нобелова награда за мир.
„Му предадов на американскиот претседател писмо што го напишав во мое име, во кое го информирав дека, како и многу други, го номинирав за Нобелова награда за мир“, рече тој, според Ројтерс.
„Исто така, го повикав да продолжи да работи на Блискиот Исток и Украина“, напиша Борг, додавајќи дека „денес е задоволен што ја гледа зголемената посветеност што нè приближува до мирот“.
