На 5 – ти ноември, Europe House Скопје одбележа 5 години од нејзиното отворање и воспоставувањето на мрежата на „места на новата генерација“ во земјава. Годишнината се совпадна со Меѓународниот драмски студентски фестивал „Скомрахи“, кој се одржа од 01 до 5 ноември. Во склоп на „Скомрахи“ кои годинава се под покровителство на Europe House, се одржаа 6 театарски претстави, 8 филмови, 1 изложба и бројни студентски средби. Завршувањето на „Скомрахи“ го одбележа централниот настан на мрежата на Europe House.
Културата е само една област од активностите на Europe House. Мрежата, исто така, вклучува учесници од областа на животна средина, образование, здравство, човекови права, дигитални вештини, претприемништво и многу повеќе. Целта е да се вклучат младите во активности и иницијативи кои се важни за нив и кои се поврзани со ЕУ, нејзините вредности и политики.
Амбасадорот на ЕУ, Михалис Рокас по овој повод рече:
„Мисијата на Europe House е да ја приближи ЕУ до младите луѓе и во исто време да им помогне да ги остварат своите соништа и аспирации овде во Северна Македонија. На овој начин сакаме да придонесеме за подготвување на новата генерација идни граѓани и лидери на ЕУ“.
„До денес, мрежата на Europe House организираше околу 3.500 настани, во кои учествуваа 140.000 учесници. Секој ден, 70-100 млади луѓе комуницираат со или преку мрежата – било да е тоа за поттикнување врски, учење или споделување визија за иднината. Мрежата на Europe House ќе продолжи да биде енергична, да ги зближува младите и општеството да споделуваат идеи, да учат и – што е најважно, да прават разлика“ велат од Јуроп Хаус.
– Само два месеци сум во земјава, но веќе сум импресиониран од повратниот одговор што го добив од активностите на Europe House, од седумте Europe Houses кои ги имаме во земјава, пред се од младите нови генерации, затоа што ова е место за нив. Ги направивме овие седум од нив и за нив. Тие секогаш велат дека ова е просторот кој што всушност им недостасуваше. Тука не се дебатира само за иднината, за европската интеграција, туку исто така и за проблемите со кои што секојдневно младите се соочуваат. И мислам дека ова е одлична платформа и потребно е дури и да ја подобриме. Врските се таму, платформите се таму, така што треба сега да се ангажираме и сите пораки и сите повратни одговори кои ги добиваме, да пробаме да ги примениме во она што го правиме и да ја подржиме Северна Македонија во патот кон пристапување во ЕУ – вели за Трн Михалис Рокас, амбасадор на Европската Унија во Република Северна Македонија.
Јуроп Хаус во Северна Македонија беше отворена во ноември 2019 година, со отворање на Канцеларија во Скопје од страна на тогашниот претседател на Европскиот парламент Давид Сасоли Во текот на петте години, мрежата прерасна од една на седум со отворање на канцелариии во Крива Паланка и Струмица (2020), Битола и Велес (2023) и Струга и Тетово (2024).
– Секако знаеме дека во земјава има излевање на интелектуалци во други земји. Знаеме дека младите и новата генерација бараат можности на други места. Затоа сакаме да ги искористиме врските од Europe House и секако соработката која што ја имаме со повеќе министерства, особено со Министерството за образование и наука, и да се осигураме дека младите и новите генерации ќе останат во државава, ќе придонесуваат за економијата и ќе имаат вистинска иднина – вели амбасадорот Рокас.
