Четирите најголеми технолошки компании во светот – Microsoft, Alphabet (Google), Amazon и Meta – во 2026 година ќе инвестираат повеќе од 650 милијарди долари во развој на вештачка интелигенција (AI). Станува збор за драматично зголемување на вложувањата, насочени пред сè кон набавка на AI чипови, сервери и изградба на инфраструктура за дата-центри.
Огромни инвестиции во AI инфраструктура
Amazon соопшти дека во 2026 година ќе инвестира околу 200 милијарди долари, додека Alphabet најави капитални вложувања од 175 до 185 милијарди долари. Meta, пак, кон крајот на јануари излезе со план за инвестиции во распон од 115 до 135 милијарди долари, а проекциите на Microsoft за фискалната 2026 година достигнуваат околу 145 милијарди долари.
Во зависност од конечните износи, вкупната инвестиција на овие четири компании ќе се движи меѓу 635 и 665 милијарди долари, што претставува раст од 67 до 74 проценти во споредба со 381 милијарда долари вложени во 2025 година.
Претпазливост кај инвеститорите
И покрај импресивните бројки, пазарот на акции реагираше воздржано. Акциите на Amazon паднаа за повеќе од 8 проценти, додека Alphabet и Microsoft забележаа пад од 3, односно 11 проценти. Кај Microsoft, дополнителен фактор беше и побавниот раст во облачниот сервис Azure.
Исклучок е Meta, чии акции се стабилизираа и закрепнаа откако компанијата покажа дека инвестициите во AI веќе носат раст на приходите од рекламирање.
Аналитичарите го поздравуваат скептицизмот
Според аналитичарот Гил Лурија од DA Davidson, внимателниот пристап на инвеститорите е „многу здрав“.
„Овој степен на скептицизам е поздрав од сè што сме виделе во претходните инвестициски циклуси“, вели Лурија.
Тој додава дека инвеститорите сега многу повеќе се фокусираат на повратот на инвестициите, особено по стравувањата од можен AI-пазарен балон кои се засилија во втората половина на 2025 година.
Кој моментално најмногу добива од AI трката?
Додека се чека овие масивни вложувања да се одразат врз приходите на технолошките гиганти, јасно е кои се моменталните победници – производителите на чипови. Компании како Nvidia, Broadcom и AMD веќе бележат значителен раст. По најавата на Amazon, акциите на Nvidia и Broadcom пораснаа за речиси 5 проценти, а AMD забележа раст од над 6 проценти.
