Мета додава превод на пораки во реално време на својата популарна апликација за пораки WhatsApp, со цел да ја олесни комуникацијата меѓу милијарди корисници ширум светот.
Новата опција за превод првично ќе биде достапна на 19 јазици за корисници на iPhone и 6 јазици за Android уреди, со планови за проширување на бројот на јазици во иднина, рече Мета, сопственик на Facebook и Instagram.
Корисниците кои сакаат да преведат порака ќе можат да го држат прстот на текстот, да кликнат на опцијата „Преведи“ и да го изберат посакуваниот јазик, слично како што веќе функционира во апликацијата iMessage на Apple.
На Android уредите ќе биде достапна опцијата за автоматски превод на целиот разговор, што дополнително ја поедноставува комуникацијата.
„Се надеваме дека оваа функција ќе помогне во рушењето на јазичните бариери и ќе им овозможи на корисниците подлабоко да се поврзат“, објави Мета во блог пост.
За корисниците на Android, достапните јазици во првата фаза ќе бидат: англиски, шпански, хинди, португалски, руски и арапски.
Корисниците на iPhone ќе имаат пристап до тие јазици, како и до дополнителни јазици како што се: холандски, француски, германски, индонезиски, италијански, јапонски, корејски, мандарински кинески, полски, тајландски, турски, украински и виетнамски.
Мета нагласи дека преводот ќе се врши директно на уредите на корисниците, со цел да се зачува приватноста на разговорот. WhatsApp користи енкрипција од крај до крај, а компанијата нагласува дека не чита ниту слуша приватни пораки.
WhatsApp моментално има повеќе од три милијарди корисници во над 180 земји, според Мета.
