Неверојатни вести пристигнуваат од таборот на Мерцедес. Гигантот од Штутгарт најавил намалување на трошоците за производство, но и лансирање на дури 36 нови модели. И тоа не е се – повеќето нови возила, што никој не го очекуваше, ќе бидат со класични мотори со внатрешно согорување.
Конкретно, Мерцедес ќе претстави 17 електрични и дури 19 модели со класичен погон во наредните две години. Овие вторите ќе продолжат да се продаваат и во следната деценија. Сето ова доаѓа од производител кој до неодамна тврдеше дека до 2030 година на најразвиените и најголемите пазари ќе нуди исклучиво електрични автомобили.
Разликата во дизајнот помеѓу класичните и електричните модели ќе биде минимална, дури и кај најпрестижните возила кои се движат на целосно различни платформи. Очигледно е дека EQS бил скапа лекција за Мерцедес, па не е изненадувачки што сега моделите нема да се разликуваат драстично во дизајнот.
Листата на новитети започнува со новата CLA класа, која ќе биде достапна во двете верзии на погон, а ќе се нуди и како караван и како SUV. Сличен пристап следи и новата C класа заедно со моделот GLC.
Мерцедес исто така потврди дека работи на електричната верзија на E класа како одговор на BMW i5. Што се однесува до моделите со фосилни горива, прва на ред за редизајн е S класа – и да, V12 моторот останува во понудата.
Профитот на автомобилското одделение паднал за 39% на 8,7 милијарди евра за време на тешката 2024 година, а прогнозите за 2025 се уште поцрни. Затоа Мерцедес планира намалување на трошоците за 10% до 2027 година, а потоа ќе продолжи со дополнителни заштеди сè до 2030.
И покрај мерките на штедење, сите фабрики во Германија ќе продолжат да работат, иако вкупното производство ќе биде намалено од 2,5 милиони на 2 до 2,2 милиони возила. Сепак, производството на барем еден модел ќе биде префрлено во Унгарија, каде што трошоците за производство се пониски за дури 70%.
Мерцедес исто така планира да го зголеми фокусот на производството на возила за американскиот и кинескиот пазар во рамките на тие земји, за да се заштити од царински пречки и други пазарни неизвесности.
