Германскиот канцелар Фридрих Мерц денеска изјави дека Берлин ќе обезбеди 29 милиони евра итна хуманитарна помош за Појасот Газа, откако Израел го ратификуваше договорот за прекинот на огнот со Хамас.
Тој на платформата Икс наведе дека Германија заедно со Египет, ќе организираат конференција за реконструкција на Појасот Газа.
Мерц наведе дека примирјето по повеќе од две години конфликт е „добра вест за луѓето од Блиски Исток и пошироко“.
– Нè води јасен компас: Германија се залага за постоењето и безбедноста на Израел. Веруваме дека решението со две држави нуди најдобра шанса Израелците и Палестинците да живеат заедно во мир и безбедност, наведе Мерц.
Тој додаде дека Берлин е подготвен да учествува во работата на новиот Мировен совет, предложен од американскиот претседател Доналд Трамп.
