Фридрих Мерц, кој на 6 мај ќе стане нов германски канцелар, изјави за бизнис весникот Handelsblatt дека се залага за создавање трансатлантска зона на слободна трговија без никакви царини меѓу Европа и САД.
Мерц смета дека било голема грешка што не се завршил договорот за слободна трговија познат како Трансатлантско трговско и инвестициско партнерство (TTIP).
„Да, се надевам на нов трансатлантски договор за слободна трговија. Нула проценти царини на сè. Тоа би било подобро за двете страни,“ изјави тој.
Овие коментари доаѓаат во време кога Вашингтон води драматична и често непредвидлива трговска политика, воведувајќи високи царини кон бројни земји, а потоа ги паузира.
Американскиот претседател Доналд Трамп ги запре преговорите околу TTIP со ЕУ во 2017 година, на самиот почеток од неговиот прв мандат.
Илон Маск, советник на Трамп и милијардер, исто така поддржа идеја за зона на слободна трговија меѓу САД и ЕУ, без царини. Трамп во моментов преговара со повеќе земји, во рамките на 90-дневна пауза што ја прогласи откако првично воведе нови царини.
И покрај тоа, пазарите остануваат нестабилни, поради стравувањата од понатамошни економски тензии.
Мерц додаде дека Европската унија мора да говори со еден глас, да покаже способност за дејствување и со самодоверба да ги претстави своите интереси. Тој уште минатата година, во текот на изборната кампања, повика на договор за слободна трговија со САД.
