Стратегијата, објавена во петокот, ги прикажува европските сојузници како слаби, истовремено нудејќи недвосмислена поддршка за крајно десничарските партии и упатувајќи критики кон европските политики за слобода на говор и миграција.
Мерц остро се спротивстави на идејата дека европската демократија има потреба од надворешно спасување. „Не гледам никаква потреба Американците да ја спасуваат демократијата во Европа. Доколку некогаш ѝ биде потребна помош, ние самите ќе го направиме тоа“, изјави тој.
Канцеларот додаде дека содржината на документот не го изненадила, бидејќи е во линија со пораките што потпретседателот на САД, Џејмс Дејвид Венс, им ги упати на европските сојузници во Минхен во февруари.
Претседателот на Европскиот совет, Антонио Кошта, вчера порача дека САД не треба да се мешаат во европските внатрешни прашања, истакнувајќи дека единствено европските граѓани можат да одлучуваат кои политички сили ќе ја водат Европа.
Мерц истакна дека одредени делови од американскиот документ се „неприфатливи од европска перспектива“ и нагласи дека стратегијата само ја потврдува неговата одамнешна оценка: европските држави мора сериозно да ја зајакнат својата безбедносна автономија.
САД минатата недела ја објавија „Националната стратегија за безбедност“, во која претседателот Доналд Трамп најавува мерки за запирање на масовните миграции и воспоставување построга контрола на границите како клучен елемент на американската безбедност.
Извор: N1info.rs
