Следниот германски канцелар, Фридрих Мерц, денеска изјави дека довербата во демократијата во неговата земја е нарушена, нешто што го поврза со зголемената поддршка за крајната десница, објавија светските агенции.
-Довербата во нашата демократија е оштетена како никогаш досега во повоената историја на нашата земја, изјави Мерц на партиската конвенција на Христијанско-демократската унија (ЦДУ), забележувајќи за подемот на антиимиграциската партија Алтернатива за Германија.
Европската унија е „под закана“ од војната во Украина, како и од „исплашените, несигурни, па дури и радикализирани граѓани во нејзините граници“, рече Мерц.
-Понатаму, од почетокот на оваа година почнавме да сфаќаме дека повеќе не можеме да бидеме сигурни во трансатлантските врски во духот на слободата и врз основа на правила и ред, додаде тој.
Мерц, исто така, предупреди дека не е јасно дали воениот сојуз на НАТО ќе преживее во наредните децении.
-Ќе им предложиме на САД дека најдобро ќе биде доколку сите царински давачки во меѓусебната трговија се спуштат на нула, рече најверојатниот нов германски канцелар.
Тој, исто така, предложи „меѓусебно признавање на технолошките стандарди“ меѓу Германија и САД.
-Тоа што го видовме во последните години и децении се сè повеќе дивергентни технички бариери меѓу поединечните главни трговски земји во светот, кои треба да ги надминеме и кои би можеле да придонесат и за одржливо намалување на бирократијата, додаде тој.
