Германскиот канцелар Фридрих Мерц денеска разговарал со американскиот претседател Доналд Трамп за ситуацијата во Иран, Израел и Украина, објави самиот Мерц на социјалните мрежи. Тој наведе дека двајцата лидери се согласиле да останат во близок контакт и дека разговорот наскоро ќе продолжи.
Разговорот доаѓа во време на силна ескалација на Блискиот Исток, додека САД и Иран разменуваат закани за удари врз енергетска инфраструктура, а конфликтот веќе се прелева и врз глобалните пазари.
Мерц и Трамп се сретнаа во Белата куќа претходно овој месец, само неколку дена по првите американско-израелски напади врз Иран.
Германскиот канцелар претходно јавно порача дека овој конфликт никому не му носи корист и дека Германија нема да учествува во војната. Воедно, тој нагласи и дека Берлин не бил консултиран пред нападите.
