Ромите имаат клучна и интегрална улога во обликување на европскиот наратив и во поттикнување на различноста и единството во земјава. Оттука и потребата да се зајакне нивното политичкото учество и политичка едукација и истовремено да се работи на јакнењето на граѓанските и на политичките права на целата ромска заедницата. Сето ова е пораката на настанот “Добро за Ромите, добро за Северна Македонија” што викендов го организираше “Фондацијата Ромите за демократија”, која е дел од мрежата “Фондација Ромите за Европа”.
– Проблемите на Ромите ги знаат сите и тие со години само се таложат. Она што е ново е само нивото на интензитет на тие проблеми кога ќе дојдат во допир со сите останати проблеми со кои се соочуваат државите. Сето тоа го става прашањето за системско решавање на проблемите на Ромите во трет колосек. Но, ние својот избор го направивме и мора да одиме напред без оглед на тоа дали имаме пријатели по пат или не. Останува на националните влади дали сакаат да работат заедно со нас и во оваа борба да покажеме прогрес кој ќе доведе до тоа да биде добро и за Ромите и за Македонија.
Јас сум оптимист затоа што немаме опција да се предадеме. Мора да се бориме –вели Менсур Халити, основач на “Ромите за демократија” На престојните избори, Фондацијата ќе ги насочи сите напори кон решавање на итните прашања поврзани со ромската заедница. Стратешкиот пат кон исполнување на овие цели, велат е во препознавањето на внатрешната врска помеѓу просперитетот на Ромите и благосостојбата на нацијата. Стремеж на Фондацијата е да се поддржат најкредибилните и најкомпетентните лица од ромската заедница, не само во Северна Македонија туку и низ Европа.
