Џорџа Мелони, 48-годишната конзервативка која ужива наклонетост од Трамп, беше единствената лидерка од Европската унија поканета на неговата инаугурација во јануари. Потегот на Трамп минатата недела – да ги стави повеќето глобални царини во мирување на 90 дена – делумно го ублажи притисокот врз Мелони.
Американскиот претседател Доналд Трамп и италијанската премиерка Џорџа Мелони, неговата блиска сојузничка, изразија оптимизам во однос на решавање на трговските тензии што ги заострија односите меѓу САД и ЕУ, непосредно пред нивната средба во Белата куќа. Европската унија се соочува со увозни царини од 25% на челик, алуминиум и автомобили, како и пошироки царини на речиси сета останата стока, според трговската политика на Трамп, за која неговата администрација тврди дека ги казнува земјите што поставуваат високи бариери за американскиот извоз.
Седејќи спроти Трамп на маса пред ручекот во Белата куќа, Мелони рече дека е сигурна оти ќе можат да постигнат договор околу трговијата. „Сигурна сум дека можеме да се договориме, и тука сум да помогнам во тоа“, изјави италијанската премиерка. Трамп исто така изрази уверување дека ќе се постигнат трговски договори, но додаде дека „никаде не брза“.
„Ќе имаме многу малку проблеми при склучување договори со Европа или со било кого друг, затоа што имаме нешто што сите го сакаат“, рече Трамп.
Мелони најави дека ќе го покани Трамп во посета на Италија. Таа додаде дека очекува Италија да може да објави на следниот самит на НАТО во јуни дека ќе го достигне целта од 2% од БДП за трошоци за одбрана.
„Имаме одлични односи – и лично, и како земји“, рече Трамп.
