Меланија Трамп во четвртокот, јавно ги негираше тврдењата дека била поврзана со Џефри Епстин, изјавувајќи дека никогаш немала однос со него и дека не е една од неговите жртви. Обраќањето беше одржано во Белата куќа, без прашања од новинарите, и повторно ја отвори темата што администрацијата на Доналд Трамп со месеци се обидува да ја оттурне од политичкиот фокус.
Таа исто така ги отфрли шпекулациите дека Епстин ја запознал со Доналд Трамп. Според нејзината изјава, со идниот американски претседател се запознала на забава во Њујорк во 1998 година, а со Епстин првпат се сретнала дури во 2000 година, на друг настан на кој присуствувала заедно со Трамп.
Во обраќањето, Меланија Трамп рече и дека никогаш не била пријателка со Епстин, ниту со неговата долгогодишна соработничка Гислејн Максвел, со која, како што тврди, имала само повремена и незначителна преписка. Меѓу документите што досега беа објавени има и мејл од 2002 година што таа ѝ го испратила на Максвел за текст во списание, а самата Трамп го опиша како „тривијална белешка“.
Нејзиниот настап доаѓа во момент кога случајот Епстин повторно создава политички притисок врз Доналд Трамп. Ројтерс наведува дека минатата недела тој ја разрешил државната обвинителка Пам Бонди, која се соочуваше со критики поради бавното објавување на милиони документи поврзани со истрагите за Епстин. Истовремено, анкетите на Reuters/Ipsos покажуваат ниска доверба во начинот на кој администрацијата се справува со ова прашање и широко уверување дека федералната власт крие дел од информациите.
Меланија Трамп побара и Конгресот да организира јавни сослушувања на жртвите на Епстин, но дел од преживеаните се спротивставија на таа идеја, оценувајќи дека тие веќе дале доволно искази и дека сега е ред на американското Министерство за правда да постапува.
Целиот настап беше невообичаен и поради тоа што првите дами во САД многу ретко директно се вклучуваат во вакви политички и чувствителни контроверзии. Токму затоа, наместо да ја затвори темата, ова обраќање повторно ја врати во центарот на јавноста
