По инцидентот во кој мексиканската претседателка Клаудија Шејнбаум беше малтретирана во јавност, а настанот беше снимен со камера, нејзината влада денеска претстави план за борба против сексуалното вознемирување, со кој тоа ќе биде класифицирано како тешко кривично дело во сите сојузни држави.
Планот предвидува кампања за охрабрување на жртвите да ги пријавуваат случаите и подобрување на пристапот до правда.
„Сите жени, адолесцентки и девојчиња треба да знаат дека не се сами“, изјави министерката за женски прашања Ситлали Ернандес Мора.
„Ако доживеат каква било форма на насилство, важно е тоа да го пријават“, рече таа и ги повика мажите да го преиспитаат своето однесување кон жените.
Неколку дена претходно, 63-годишната Шејнбаум беше сексуално вознемирена од маж додека шетала низ историскиот центар на Мексико Сити.
Според видеото што беше објавено на интернет, тој ѝ приоѓа од страна, ѝ ја става раката околу рамото, се обидува да ја бакне и се гледа како се обидува да ги допре нејзините гради.
Мажот подоцна беше уапсен.
Шејнбаум, левичарска политичарка, е првата жена претседателка на Мексико.
Според податоците од државниот завод за статистика, речиси половина од сите жени во Мексико доживеале сексуално насилство најмалку еднаш во животот.
Шејнбаум изјави дека зајакнувањето на правата на жените е еден од нејзините најважни приоритети.
