Меѓународниот ден на книгата за деца се одбележува на 2 април, на роденденот на Ханс Кристијан Андерсен, еден од најпознатите раскажувачи на бајки во светот. Овој ден има за цел да ја поттикне љубовта кон читањето кај најмладите и да ги воведе во богатството на книжевниот свет уште од рана возраст.
Празникот е воспоставен во 1967 година од страна на Меѓународна унија за младинска книжевност, а секоја година друга земја подготвува порака и илустрација. Годинава пораката е дело на кипарската авторка Елена Периклеус и носи наслов „Градина на расцветани приказни“. Таа раскажува за момче кое преку читањето создава свој свет исполнет со надеж, фантазија и убавина, претворајќи го во вистинска градина на чудата.
Преку книгите, детето во приказната станува различни ликови – херои, истражувачи и сонувачи – градејќи сопствен универзум што му дава сила и инспирација. Иако реалниот свет не секогаш се менува како што посакуваме, читањето нуди можност да се создаде подобар, личен свет исполнет со смисла и креативност.
По повод овој ден, се организираат бројни активности што ги поттикнуваат децата да читаат, како работилници, изложби и настани во библиотеки. Целта е да се разбуди интересот за книгата и да се развие навиката за читање, која има клучна улога во образованието и личниот развој.
