Во текот на ноќта кон петок и во петок, под влијание на нов, поизразен влажен бран од Медитеранот, во Македонија се очекуваат нови врнежи од дожд, додека на планините и на повисоките места над 1000 метри надморска височина – особено во западните предели – ќе има врнежи од снег.
Со тоа ќе дојде до зголемување на снежната покривка на планините и во скијачките центри, што е добра вест за љубителите на зимските спортови.
Најмногу врнежи во западните предели
Пообилни врнежи повторно се очекуваат во западниот дел од земјата, каде локално може да наврнат од 20 до 25 литри воден талог на метар квадратен.
Повремено ќе дува засилен ветер од јужен и југоисточен правец, што дополнително ќе го засили чувството на променливо и нестабилно време.
Времето во Скопје
И во Скопје и околината во споменатиот период ќе има врнежи од дожд, проследени со повремено засилен ветер од јужен и југоисточен правец.
Во петок попладне врнежите постепено ќе престануваат, а температурите ќе се движат во интервал од 2 до 9 степени Целзиусови. Во главниот град максималната температура ќе достигне околу 6 степени.
