Од древниот Египет до модерните домови, мачките остануваат симбол на независност, елеганција и мистерија.
Првпат воспоставен во 2002 година од страна на International Fund for Animal Welfare, овој ден има за цел да го зголеми вниманието кон благосостојбата на мачките ширум светот, особено на оние без засолниште. Од 2020 година, со прославата управува меѓународната организација International Cat Care, која со децении се залага за заштита и подобар третман на мачките.
Од божества до интернет ѕвезди
Мачките имаат богата историја. Во античкиот Египет биле обожувани како божества – Мафдет, првата позната божица-мачка, била чувар од змиите и злото. Подоцна, во античка Грција и Рим, тие се користеле за борба против штетници. Во средниот век, пак, мачките биле жртви на суеверија и обвинувани за ширење болести, особено за време на Црната чума. Денес, тие се вистински ѕвезди – и во домовите и на интернет.
Како се одбележува празникот?
Мачките добиваат кралски третман на овој ден. Сопствениците ги даруваат со омилени грицки, нови играчки или едноставно со повеќе внимание и љубов. Воедно, многу организации организираат кампањи за вдомување и собирање донации за засолништа.
Но, Меѓународниот ден на мачките не е само повод за милување и разгалување – тој е и потсетник дека милиони мачки ширум светот живеат на улица, изложени на глад, болести и насилство. Затоа, овој ден е идеален за да се направи хуман гест: да се нахрани улична мачка, да се донира за засолниште или – зошто да не – да се вдоми нова мачка.
Интересни факти:
- Најгласното мјаукање досега измерено достигнало 67,8 децибели – рекорд што го држи мачето Мерлин од Велика Британија.
- Мачките можат да трчаат со брзина до 48 км/ч.
- Повеќето мачки спијат дури 70% од својот живот.
- Според Гинисовата книга на рекорди, најбогатата мачка наследила 7 милиони фунти.
Зошто ги сакаме мачките?
Научно е докажано дека мачките можат да го намалат нивото на стрес и анксиозност кај луѓето. Самото нивно присуство, нежните движења и умирувачкото мјаукање делуваат терапевтски. Иако често се опишуваат како независни, мачките се длабоко емпатични суштества кои создаваат силни врски со своите луѓе.
Нека секој ден биде ден на мачките – но на 8 август, нека бидат во центарот на вниманието!
Поделете љубов, вдомете, донирајте или едноставно – поминете време со вашето мече.
Извор: nationaltoday
