Како можеме да донесеме филмови на места каде што никогаш порано не постоело кино? Како да се осигураме дека моќните приказни ќе стигнат и до најоддалечените делови на нашите општества? И како да го направиме тоа на одржлив, инклузивен и поетичен начин?
Две визионерски киноиницијативи—мрежата „Solar Cinema“ и Патувачкото кино на „МакеДокс” ќе одржат мастерклас на 23 август од 11 до 13 часот во Лабораториум. Заедно тие ќе истражуваат колкав потенцијал има киното во децентрализирање на културата и демократизирање на пристапот до уметноста.
„Solar Cinema“ е меѓународна мрежа на мобилни кина што користат соларна енергија, посветена на промоција на обновлива енергија и проширување на пристапот до кино. Користејќи 100% соларна енергија, тие организираат проекции на отворено во јавни простори по зајдисонце – целосно самостојни и надвор од електричната мрежа. Патувајќи преку граници и низ различни пејзажи, тие носат невидени филмови на необични места.
На другата страна од Европа се наоѓа филмскиот карван на патувачкото кино на „МакеДокс“ предводен од едно магаренце кое патува насекаде низ руралните области на Северна Македонија. Со рачно изработено платно, поетски дух и силна верба во моќта на раскажувањето приказни, тимот на „МакеДокс“ секое лето посетува 7–10 нови села во Македонија – понекогаш дури преминувајќи ја и границата со Албанија. Проекциите на „МакеДокс“ под отворено небо досега собрале над 13 000 луѓе во публика, на повеќе од 100 локации каде што киното одамна било заборавено или никогаш не постоело.
На овој мастерклас, креаторите на двата проекта ќе ги споделат своите видувања, предизвици и спомени од патешествијата. Заедно ќе размислуваат за киното како инструмент за општествена вклученост, катализатор за разговор и носител на светлина – понекогаш во буквалната смисла на зборот.
Во најава се приказни за магариња, соларни панели, љубопитни мештани, преминување граници, поезија, кромид – и многу љубов кон документарните филмови.
