Вредноста на синдикалната минимална кошница за март изнесува 67.818 денари, што претставува зголемување од 436 денари во однос на февруарските 67.382 денари, пресмета Сојузот на синдикати на Македонија (ССМ).
За домаќинство кое плаќа и кирија за стан од околу 60 квадратни метри, вкупната вредност на кошницата достигнува 83.193 денари. Според податоците на ССМ, зголемувањето на трошоците за живот во периодот јануари–март 2026 година изнесува вкупно 2.326 денари.
Најголем дел од синдикалната кошница и понатаму отпаѓа на храната и пијалаците, со учество од 37,3% и износ од 25.292 денари. Следуваат трошоците за образование (10,6%), станарина, комуналии и енергенси (9,3%), како и облека и обувки (8,9%).
Во структурата на трошоците се вклучени и рекреација и култура (8,2%), транспорт (7,2%), ресторани и хотели (6,1%), комуникации (5%), лична хигиена (4%), здравје (1,7%) и останати стоки и услуги (1,6%).
Податоците укажуваат на континуиран раст на трошоците за живот, при што најголемиот товар и понатаму паѓа на основните потреби како храна и домување.
